ԵՊԲՀ շրջանավարտները աշխարհի միջօրեականներում

Երևանի Մ. Հերացու անվան պետական բժշկական համալսարանի մեծ դահլիճում հանդիսավոր պայմաններում տարեվերջին դիպլոմներ հանձնվեցին ընդհանուր բժշկության, ստոմատոլոգիական, դեղագիտական ֆակուլտետների արտասահմանցի 106 շրջանավարտների:

Հանդիսությանը մասնակցում էին ՀՀ-ում Սիրայի Արաբական Հանրապետության դեսպանատան ժամանակավոր կցորդ Մամուն Հարիրին` տիկնոջ հետ, խորհրդական Հուսամ Հաֆեզը, Հնդկաստանի և Իրանի դեսպանատների ներկայացուցիչներ, ինչպես նաև շրջանավարտների` Հնդկաստանից, Իրանից, ՌԴ-ից ժամանած ծնողներ, հարազատներ:

Սիրելի´ շրջանավարտներ, հարգարժա´ն հյուրեր, Երևանի պետական բժշկական համալսարանի այս դահլիճում հերթական անգամ հավաքվել ենք` շնորհավորելու բժշկի դժվարին, պատասխանատու և նվիրում պահանջող մասնագիտությունն ընտրած մեր ապագա գործընկերներին: Այս օրը հիշարժան է յուրաքանչյուրիդ կյանքում, քանի որ ավարտելով համալսարանը ազդարարվում է նոր կյանքի սկիզբ: Դուք ստանձնում եք մի առաքելություն, որի կրողն եք լինելու ձեր ողջ գիտակցական կյանքի ընթացքում, մաքառումների ու ձեռքբերումների շնորհիվ հաստատվելու եք` որպես պահանջված և որակյալ մասնագետներ, իսկ ուսումնառության ընթացքում ձեռք բերած գիտելիքներն ու հմտությունները ձեզ հնարավորություն են տալու առավել վստահ իրագործելու այն երդումը, որի բովանդակությունն ինքնին թելադրում է զգոնություն, զսպվածություն, պատասխանատվության բարձր զգացում, համբերատարություն, մարդասիրություն: Թվարկված կարևորագույն հատկանիշերի շնորհիվ մեր Alma- Mater-ը միշտ էլ հավատարիմ է այն արժեքներին ու լավագույն ավանդույթներին, որոնք տասնամյակների ընթացքում ձևավորվել են պրոֆեսորադասախոսական կազմի, աշխատակիցների ու ուսանողների տարբեր սերունդների կողմից:

Երևանի պետական բժշկական համալսարանի շատ շրջանավարտներ միշտ էլ աչքի են ընկել ոչ միայն բարձր պրոֆեսիոնալիզմով, այլև լայն մտահորիզոնով, պատասխանատու որոշումներ ընդունելու յուրօրինակ ձիրքով: Այս ամենը փաստում է, որ մեզ մոտ մեծ ուշադրություն է դարձվում ուսանողների մասնագիտական պատրաստակամության, դաստիարակության խնդիրներին:

Սիրելի´ շրջանավարտներ, ես մեծ հպարտությամբ և ամենայն պատասխանատվությամբ հայտարարում եմ, որ այսօր Հայաստանի Հանրապետությունում բժշկական գիտելիքների դասավանդման ոլորտում կրթության անվիճարկելի առաջատար, ավելի քան ինը տասնյակ տարիների փառահեղ պատմություն ունեցող Երևանի պետական բժշկական համալսարանն արժանի հեղինակություն է վայելում ոչ միայն մեր երկրում, այլև նրա սահմաններից դուրս և աչքի է ընկնում իր բարձր վարկանիշով: Այդ են վկայում տարբեր երկրներից` Սիրիայից, Հնդկաստանից, Լիբանանից, Իրանից, Իրաքից, Բուլղարիայից, ԱՊՀ տարբեր երկրներից, Հունաստանից, ԱՄՆ-ից տարիներ շարունակ մեզ մոտ ուսանելու եկած և բժշկական այս դժվարին ոլորտում արդեն կայացած մեր նախկին շրջանավարտների ծավալուն գործունեությունը:

Այսօր հայ ուսանողների հետ կողք կողքի մեր համալսարանում գիտելիքներ և մասնագիտական կրթություն են ստանում շատ օտարազգի ուսանողներ, ովքեր, ուսանող լինելուց զատ, նաև մի յուրօրինակ կամուրջ են մեր երկրների միջև:

Կրթական ծրագրերի և ուսումնական գործընթացի կազմավորմանը զուգընթաց` համալսարանում կազմակերպվող բազմաթիվ միջոցառումների շնորհիվ փորձում ենք լավագույնս ծանոթանալ այդ երկրների հարուստ մշակույթին, պատմությանը, ազգային ավանդույթներին: Միաժամանակ պետք է նշել, որ վերջիններս էլ, տարիներ շարունակ ապրելով մեր երկրում և ինտեգրվելով մեր կենցաղի մշակույթին` իրենց սրտի մի անկյունում կրում են այդ արժեքները` ամրապնդելով մեր ժողովորդների բարեկամությունը:

Այստեղ` այս պատերի ներքո, կրթվել և բժշկական ոլորտում կայացել է ալյազգի և սփյուռքահայ բժիշկների մի աստղաբույլ, ովքեր չմոռանալով հարազատ կրթօջախը` աջակցել ու շարունակում են աջակցել և իրենց ավանդը ներդնել Երևանի պետական բժշկական համալսարանի զարգացման գործընթացում: 

Սիրելի´ շրջանավարտներ, միշտ հավատարիմ մնացեք բժշկի վսեմ ու պատասխանատու առաքելությանը` մշտապես պահպանելով ձեր առանձնակի տեղն ու դերը ձեր երկրների կյանքում: 

Լավատեսությունը թող երբեք չլքի ձեզ և նեցուկ լինի բոլորիդ աշխարհի որ ծայրում էլ գտնվելիս լինեք: Հավատարիմ եղեք ձեր երդմանը և հետևեք ձեր կոչմանը:

Հարցեր, պատասխաններ, մեկնաբանություններ